ციფრული ეკონომიკა და პროფესიული განათლების გამოწვევები ხელოვნური ინტელექტის ეპოქაში

Abstract

ხელოვნური ინტელექტის (AI) და ციფრული ეკონომიკის უპრეცედენტო ზრდა მსოფლიო მასშტაბით მნიშვნელოვან გარდაქმნებს აჩენს შრომის ბაზარზე, რაც ახალი, მოქნილი უნარების საჭიროებას ქმნის. ამ ტალღის ფონზე, პროფესიული განათლებისა და ტრენინგის (VET) სისტემები სასიცოცხლო როლს იძენენ სამუშაო ძალის წარმატებული ადაპტაციის უზრუნველყოფაში.
საერთაშორისო გამოცდილება გვთავაზობს ინოვაციურ გზებს VET სისტემების გასაძლიერებლად - სასწავლო პროგრამებში ციფრული კომპეტენციების ინტეგრაციას, სწრაფი ტრენინგის მოდულების შემუშავებას და საჯარო-კერძო პარტნიორობის გაღრმავებას. განსაკუთრებული ყურადღება ექცევა მიკრო-სერტიფიკატების და უნარებზე დაფუძნებული დაქირავების ზრდას, რაც თანამედროვე უნარების სწრაფ აღიარებას უწყობს ხელს.
მოცემული სტატია იკვლევს საქართველოს პროფესიული განათლების სისტემის მზადყოფნას ამ გლობალური ცვლილებებისთვის. მიუხედავად იმისა, რომ ქვეყანაში მიმდინარეობს გარკვეული ნაბიჯები ციფრული პროგრამების ინტეგრაციის მიმართულებით (როგორიცაა IT, ციფრული მარკეტინგი), ხელოვნურ ინტელექტზე ორიენტირებული სწავლება და სპეციფიკური მოკლევადიანი მოდულები ჯერ კიდევ განვითარების საწყის ეტაპზეა. კერძოდ, საქართველოს სისტემა კვლავ აწყდება გამოწვევებს, მათ შორის ახალგაზრდების დაბალ ჩართულობას VET-ში, შრომის ბაზრის მოთხოვნებთან უნარების შეუსაბამობას, კვალიფიციური კადრების სიმცირეს და ინფრასტრუქტურულ ხარვეზებს.
სტატია მიზნად ისახავს ამ კრიტიკული გამოწვევების ანალიზს და კონკრეტული რეკომენდაციების შემუშავებას, რათა საქართველოს VET სისტემამ შეძლოს AI-ის ეპოქაში ღირებული კადრების მომზადება და ხელი შეუწყოს ქვეყნის კონკურენტუნარიანობის ამაღლებას ციფრულ ეკონომიკაში.